ദീപാവലി

                   ഇന്ന് ദീപാവലി !!!! ചുറ്റും വെടിപടക്കത്തിന്റെ കാതടപ്പിക്കുന്ന ഒച്ച..... എന്നാലും എന്റെ കുട്ടിക്കാലത്തിന്റെ അത്രയും വരില്ല.... അന്നെന്താ ഒരുത്സാഹം... അയല്‍പക്കത്തെ വീടുകളില്‍ പരസ്പരം മത്സരമാണ്.... എനിക്ക് അന്നും ഇന്നും പടക്കം പേടിയാണ്.... പണ്ട് കുട്ടിക്കാലത്ത് ഓഫീസില്‍ നിന്നുള്ള അച്ഛന്റെ വരവും കാത്തു ഞങ്ങള്‍ രണ്ടു പെണ്‍കുട്ടികള്‍ വീടിന്റെ ഉമ്മറത്ത് ഉണ്ടാവും... അച്ഛന്‍ കൊണ്ടുവരുന്ന പൊതിക്കെട്ടിനായി ..... പക്ഷെ അതില്‍ പൊട്ടുന്നത് ഒന്നും ഉണ്ടാവില്ല.... തറച്ചക്രവും മത്താപ്പും പൂത്തിരിയും വര്‍ണ തീപ്പെട്ടിയും പാമ്പിന്‍ ഗുളികയും മാത്രമാവും... ഞങ്ങള്‍ക്ക് അത് മാത്രേ വേണ്ടു താനും..... ഞങ്ങള്‍ നാല് പേരും ഒരുമിച്ച് മുറ്റത്ത് ഇവയൊക്കെ കത്തിക്കും..... അടുത്ത ദിവസം രാവിലെ കാപ്പി കുടിയും ഒരു ചടങ്ങാണ്.... ഇഡ്ഡലി, സാമ്പാര്‍, പരിപ്പുവട, മധുര പലഹാരങ്ങള്‍..... നിറയെ നല്ലെണ്ണ തേച്ചു കുളിയും..... ഇതൊക്കെ എന്റെ ദീപാവലി ഓര്‍മ്മകള്‍......

                  ഇന്നും ഞാനും ഞങ്ങളുടെ ദീപാവലി മാര്‍ക്കറ്റില്‍ നിന്നും 250 രൂപ നല്‍കി ഒരു ബേബി കിറ്റ്‌ വാങ്ങി, വെടിപടക്കങ്ങള്‍ ഇല്ലാത്തത്...... ഗേറ്റ് കടക്കുമ്പോള്‍ തന്നെ ഓടിയെത്തി മക്കള്‍.... കയ്യിലെ പൊതിക്കെട്ട് കണ്ടു അവരുടെ മുഖത്തും വിരിഞ്ഞു പൂത്തിരി...... പിന്നെ ഒരു ബഹളമായിരുന്നു..... മുറ്റത്ത്‌  കസേര നിരത്തി എന്നെയും അവരുടെ അച്ചാമ്മയെയും അമ്മാമ്മയേയും വിളിച്ചിരുത്തി, വര്‍ണക്കാഴ്ചകള്‍ കാണാന്‍ ...... ഒരു പൂത്തിരി കത്തുമ്പോഴേക്കും ഞാന്‍ അകത്തേക്ക് മറഞ്ഞു ...... എന്റെ കണ്ണുകള്‍ അറിയാതെ നിറഞ്ഞു..... നിന്നെ ഞാന്‍ miss ചെയ്യുന്നെല്ലോടാ ...... നീ ഇവിടെ ഉണ്ടെങ്കില്‍ ഞങ്ങളുടെ ദീപാവലി ഇതിലും വര്‍ണ - ശബ്ദ ഗംഭീരമായേനെ !!!!!!